Алматыда Түрксіб ауданында орналасқан «Баум» тоғайында тазалық сенбілігі өтті.
Бұл игі іс – «Таза Қазақстан» республикалық бастамасының негізінде «Алматы – біздің ортақ үйіміз» эконауқаны аясында жүргізілді.
Аталған акцияға өнер адамдары, аудан тұрғындары, белсенді азаматтар, экология жанашырлары, студенттер және т.б. қатысты.
«Өз қаламыздың тазалығын сақтап, айналамызды таза ұстап, көпшілікке өзіміздің үлгі-өнегемізді көрсетсек, ұтарымыз көп. Жалпы алғанда өзімізде осындай іс-шара нәтижесінде тазалық сақтауды басты орынға қойған дұрыс деп білеміз», – деді Алатау дәстүрлі театрының труппа жетекшісі Саттар ЕРУБАЕВ.
Сонымен қатар Медеу табиғи паркі директорының міндетін атқарушы Ұзақ Жамбылұлы экологиялық ахуалды жақсарту мақсатында жүргізіліп жатқан істер төңірегінде ой қозғады.
«Таза Қазақстан акциясы бойынша біздің эко Алматы, қалалық экология және қоршаған орта басқармасы қызметкерлері және т.б. жұртпен бірігіп осындай іс-шара ұйымдастырылды. «Баум» тоғайы бойында тазалық жұмыстары жасалды. Мұның мән-маңызын біліп, өскелең ұрпақ көріп, келелі істерді үйреніп, табиғатты аялай білсе екен», – деді ол.
Сондай-ақ акцияға қатынасушылар қатарында студент жастар өз белсенділіктерін көрсетіп, келелі істің басы-қасында жүрді.
«Әрдайым осындай тазалыққа байланысты науқандарға қатысып тұрамыз. Саябақтарды, адамдар демалатын орындарды тазарту маңызды болып саналады. Өйткені қала таза әрі ұқыпты ұсталса, онда еліміз де тазарады, дами береді деп сенеміз», – деді студент Ерұлан НҰРӘДІЛ.