Алматыдағы 28 гвардияшы-панфиловшылар атындағы саябақта бір топ жасөспірімнің тұрғындарға тиісіп, тас лақтырғаны түсірілген видео әлеуметтік желіде қызу талқыланып жатыр, деп хабарлайды Aqshamnews.kz тілшісі.
Кадрларда бір топ жасөспірімнің тұрғындарға тиісіп, агрессия танытқаны байқалады.
Желі қолданушысының жазуынша, оқиға 28 гвардияшы-панфиловшылар атындағы саябақ аумағында болған. Оның айтуынша, жасөспірімдер еш себепсіз адамдарға шабуыл жасап, заттарын тартып алған, үстілеріне су шашқан. Сондай-ақ басқа келушілерге тас лақтырып, күш көрсеткені айтылды.
"Алматы. Қала орталығында не болып жатыр? Неліктен маған (және басқа адамдарға) себепсіз шабуыл жасай алады? Біздің заттарымызды тартып алды, үстімізге су шашып жіберді (мен жұмысқа бара жатқан едім), басқа адамдарға тас лақтырып, ұрып-соқты", – деп жазды желі қолданушы.
Оқиғаға қатысты Алматы қалалық Полиция департаменті пікір білдірді. Ведомство мәліметінше, аталған жайт бойынша Медеу аудандық полиция басқармасы тексеру жүргізіп жатыр.
“Полиция қызметкерлері заңда көзделген тиісті шараларды қабылдайды. Жағдай бақылауда. Сонымен қатар полиция кез келген әдепсіз мінез-құлық көріністері, сондай-ақ айналадағы адамдарға қолайсыздық немесе қауіп төндіретін әрекеттерге жол берілмейтінін ескертеді. Полиция азаматтарды қоғамдық тәртіп нормаларын сақтауға және бір-біріне құрметпен қарауға шақырады”, – делінген департамент хабарламасында.