Таразда белгісіз ер адамдар 13 жастағы қыз баланы көлікке күштеп отырғызып әкетпек болған. Оқиға күндіз, 16 ақпанда қоғамдық көлік аялдамасының маңында болған және бейнебақылау камерасына түсіп қалған, – деп хабарлайды aqshamnews.kz тілшісі.
Видео Instagram желісіндегі taraz_life парақшасында жарияланды. Жазбаға пікір қалдырған оқырманның айтуынша, қаскөйлерге аялдамада тұрған ер адам кедергі келтірген. Ол араласқаннан кейін күдіктілер оқиға орнынан қашып кеткен.
Алдын ала мәлімет бойынша, бейнежазбаны қыздың әкесі бақылау камерасынан алған. Жазбаны көріп отырған сәтте ол қызымен байланысып, болған жағдайды нақтылаған, бұл әңгіме видеода ішінара естіледі. Қыздың сөзінше, ер адамдардың бірінің басында ақ түсті бас киім болған.
Тараз қалалық полициясы қызды ұрламақ болған күдіктілердің ізін суытпай ұсталғанын мәлімдеді.
«Полицияға көлікпен жүрген екі белгісіз адамның аялдамада тұрған қызды ұрламақ болғаны туралы хабарлама түсті. Аталған факті бойынша сотқа дейінгі тергеп-тексеру басталды. Оқиға орнына полиция қызметкерлері дереу жетті. Күдіктілер ұсталып, уақытша ұстау изоляторына қамалды. Қазіргі таңда оқиғаның барлық мән-жайын жан-жақты анықтауға бағытталған тергеу әрекеттері жүргізіліп жатыр», — делінген хабарламада.
Полиция өкілдері балалардың қауіпсіздігіне қол сұғу фактілері ерекше бақылауда екенін және мұндай әрекеттер заң аясында қатаң түрде тоқтатылатынын атап өтті.