Ұлттық ұланның Алматы қаласындағы "Оңтүстік" өңірлік қолбасшылығында Республика күніне арналған салтанатты іс-шара өтті. Оған белгілі актер, "Шестой пост" фильмінде басты рөлді сомдаған Сануржан Сүлейменов те шақырылыпты.
Салтанатты іс-шара барысында бұл мереке – ел тәуелсіздігі мен мемлекеттіліктің қалыптасу жолындағы халықтың бірлігі мен ынтымағын паш ететін маңызды күн екені атап өтілді.
– Республика күні – еліміздің жаңа дәуірге қадам басқан тарихи сәтін айшықтайтын ерекше мереке. Әскери қызметшілердің міндеті – осы тәуелсіздіктің, тыныштық пен тұрақтылықтың кепілі болу. Біз осы борышымызды абыроймен атқаруға әрқашан дайынбыз, – деді "Оңтүстік" өңірлік қолбасшылығының қолбасшысы генерал-майор Талапкер Әміреев.
Мереке аясында қызметтік борышын адал атқарып жүрген әскери қызметшілер мен қолбасшылықтың қонақтары марапатталды. Соның ішінде актер Сануржан Сүлейменов те ҚР ІІМ орынбасары – Ұлттық ұлан Бас қолбасшысының бұйрығымен "Қоғамдық тәртіпті сақтағаны үшін" төс белгісімен марапатталды. Өнер иесі өзіне көрсетілген құрмет үшін алғыс айтып, "Шестой пост" фильмінің түсірілімі кезінде әскери өмірдің жауапкершілігі мен ерліктің мәнін терең түсінгенін тілге тиек етті.
– Әскерилердің еңбегі – көрінбей жасалатын, бірақ елдің тыныштығы үшін шешуші рөл атқаратын қызмет. Сол еңбекті бағалау – әр азаматтың борышы. Ел тыныштығын сақтап жүрген әр сарбазға алғыс шексіз, – деді С.Сүлейменов.
Салтанатты іс-шара барысында Республика күніне арналған деректі фильм көрсетілді. Онда ел тәуелсіздігінің қалыптасуы, мемлекеттік рәміздердің қабылдануы және қазақ әскерінің даму тарихы баяндалды.