Талдықорғанда сыбайлас жемқорлыққа қарсы мәдениетті қалыптастыруға елеулі үлес қосқан журналистер марапатталды, деп хабарлайды aqshamnews.kz. Қоғам дертінің алдын алу тақырыбына қалам тербеген тілшілердің үздік мақалалары мен бейнемазмұндары сарапқа түсіп, жеңімпаздарға сый-құрмет көрсетілді. Байқауды ұйымдастыруға Жетісу облыстық қоғамдық даму басқармасы мен «Жетісу жастар конгресі» қоғамдық бірлестігі ұйытқы болды.
Байқауға биыл 20 шақты материал ұсынылып, олардың ішінен әділ-қазылар алқасы алтауын марапатқа лайық деп таныды. Әр жыл сайын өтетін облыстық байқауға журналистер, блогерлер мен медиа қызметкерлер белсенді қатысып, сыбайлас жемқорлықпен күрес және оның алдын алу мәселелерін көтерді.
-
Алмат Есембеков, Алакөл аудандық газетінің бас редакторы, «Бүлінгеннен бүлдіргі алма» атты мақаласымен «Интернет-ресурстағы үздік мақала» аталымын жеңіп алды. Ол өзінің мақаласында халықты сыбайлас жемқорлыққа қарсы күреске ынталандыру мен бағыттаудың маңыздылығын атап өтті.
-
Мұхтар Күмісбек, «Егемен Қазақстан» газетінің тілшісі, байқаудың «Ең үздік мақала» номинациясында жеңіске жетті.
-
Мұрат Жұмабай, «Жетісу» телерадиокомпаниясының редакторы, «Үздік бейнеролик» аталымының иегері болды.
-
Қуаныш Қанатұлы, «Qazaqstan» ұлттық арнасының тілшісі, «Әлеуметтік желілерді қамту» бойынша марапатталды.
-
Гүлжан Тұрсынова, «Jetisu» газетінің тілшісі, «Үздік журналистік зерттеу» аталымына ие болды.
Салтанатты жиында сыбайлас жемқорлықтың алдын алу мен оған қарсы күреске үлес қосқан мемлекеттік қызметкерлер де ерекше құрметке бөленді.
Бұл байқау сыбайлас жемқорлыққа қарсы күрестің маңыздылығын халыққа түсіндіру, журналистердің қоғам алдындағы жауапкершілігін арттыру мақсатында өткізілуде. Журналистердің ауқымды әрі маңызды мәселелерді көтеруі қоғамда сыбайлас жемқорлыққа қарсы мәдениет қалыптастыруға септігін тигізеді.