Алматы облысына қарасты Қаскелең қаласында отбасылық жанжал ауыр соққыға ұласқан оқиға тіркелді, деп хабарлайды Aqshamnews.kz тілшісі.
Жәбірленуші әйелдің айтуынша, ол күйеуімен ажырасу процесінде жүр. Әйелдің сөзінше, күйеуінің күш қолдануы бұрыннан қайталанып келген. Бұл жолы ер адам әйелінің анасы тұратын үйге келіп, күректің сабына ұқсас таяқпен әйелді бірнеше мәрте ұрып-соққан. Қатты соққыдан ағаштың бір бөлігі сынып кеткені бейнежазбада байқалады.
Куәгерлердің айтуынша, ер адам араша түспек болған әйелдің анасын да бірнеше рет соққыға жыққан. Бұдан бөлек, аулада тұрған көліктің терезелерін шағып, көлікті жүргізуге жарамсыз күйге түсіргені айтылады. Оқиғаның видеосы әлеуметтік желіде тарады.
Жәбірленуші өзін ауыр хәлде екенін айтып, полиция шақырғанын мәлімдеді. Сондай-ақ прокуратураға да арыз жазатынын жеткізген.
«Ол мені кезекті рет ұрып-соқты. Көлігімді де бүлдірді. Соққыдан қолым сынып кеткендей. Күректің сабымен аяғымды, арқамды оңдырмай ұрды. Анамды да соққыға жықты. Үйіміздің терезесін шағып тастады. Сол қолымды мүлдем сезбей тұрмын. Бет-аузым қан-қан. Әпкемді де ұрып тастады. Бұл қаншалықты жалғаса бермек?! Балаларымыз себеп болады. Оларды алып кеткен сайын ұрып-соғады. Полицияны шақырып қойдым. Қазір күтіп отырмын. Өтінемін, маған көмектесіңіздерші. Прокуратураға да арыз жазамын», – деп әйел адам көз жасын ұстай алмай, болған жағдайды баяндап берді.
Оқиғаға қатысты Алматы облыстық Полиция департаментіне ресми сауал жолданды. Құзырлы органның жауабы жарияланғаннан кейін қосымша ақпарат беріледі.