6 қаңтар күні Алматы облысында Алматы-Бішкек тасжолының 86-шақырымында жол-көлік оқиғасы болды, - деп хабарлайды Aqshamnews.kz.
Toyota Alphard маркалы минивэнді басқарған 33 жастағы жүргізуші көлікті игере алмай, жолдан шығып аударылған. Жүргізуші оқиға орнында көз жұмды.
Көлікте барлығы бес жолаушы болған. Олардың төртеуі - Оңтүстік Қазақстан медицина университетінің студенттері, біреуі - турист. Олар Шымкенттен Алматыға бет алған.
Алматы облыстық полиция департаментінің мәліметінше, екі жолаушы - Үндістан азаматтары ауруханада алған жарақаттарынан қайтыс болған. Тағы үш адам ауыр халде ауруханаға жеткізіліп, қазір жансақтау бөлімінде жатыр.
Аталған дерек бойынша тергеу жүргізіліп жатыр.
Қазақстандағы Үндістан елшілігі студенттердің қаза тапқанын растады. Дипломатиялық өкілдік марқұмдардың отбасыларына көңіл айтып, зардап шеккендердің туыстарымен байланыста екенін және қазақстандық билік органдарымен бірлесіп жұмыс істеп жатқанын хабарлады.
Айта кетейік, Toyota Alphard маркалы көлік жол апатына алғаш рет түсіп отырған жоқ. Жүргізушілердің жылдамдықты асыруы, шамадан тыс шаршауы және бақылаудың әлсіздігі салдарынан бұл минивэндер халық арасында "өлім көлігі" атанып кеткен.
