Оспан Өкен, ҚР Ұлттық ядролық орталығы Атом энергиясы институты перспективалық материалдар зертханасының зертханашысы:
"Қазіргі таңда біз сутегіні тасымалдау үшін оны металдың ішіне енгізу технологиясын дайындап жатырмыз. Бұл әдісте сутегіні белгілі бір температурада қыздырып, металдың ішіне енгіземіз. Қажет болған кезде оны қайта қыздырып, белгілі бір температураға жеткізіп, сутегіні шығарып аламыз. Бұл тәсіл тасымалдау көлемін азайтып, сутегінің тиімді көлемін арттырады. Зерттеу барысында сутегіні тасымалдаудың экономикалық тиімділігі де ескерілді. Біз осы мақсатта арзан әрі тиімді металдарды қолдануға бет бұрдық. Мысалы, магнийді таңдадық, себебі ол жер бетінде табылуы салыстырмалы түрде жеңіл және басқа материалдарға қарағанда арзанырақ. Палладий немесе лантан сияқты материалдармен де тасымалдауға болады, бірақ олар қымбат болғандықтан, біз арзан баламаларды зерттеп жатырмыз."
Қазіргі таңда Қазақстанда 500 миллиард текше метр көмір метанының қоры бар, және мұнай-газ өнеркәсібінде де метан ауаға тарап жатыр. Отандық ғалымдар осы метаннан сутегі өндіріп, оны халық игілігіне жаратуға ниеттеніп отыр. Атом электр станциясы салынатын болса, сутегіні кеңінен қолдануға мүмкіндік пайда болады.