Әбілхан Қастеев атындағы ҚР Мемлекеттік өнер музейінде суретші Рафаэль Слекеновтің «TANIR NURY» деген тақырыппен көрмесі ашылды.
Оған өнер өкілінің 90-ға жуық кескіндемелік туындысы қойылған, деп хабарлайды aqshamnews.kz
– Рафаэль Слекеновтің картиналары балалық шақ туралы естеліктер мен адамзат пен нәзік табиғат, қоршаған әлем арасындағы үнсіз байланысты көрсете отырып сыр шертеді. Автордың туындыларындағы жан сарайының көрінісі бір өзгеше сұлу да сырлы, таңғажайып жұмбаққа толы «үй әлемін» құрайтындай. Автор үшін бұл жұмбақ мекен үйі – қорғаны, құтқарушы орны, өмірінің жылуы мен жайлылығының көрінісі секілді. Автор дәл осы үйде, қарапайым тұрмыста, адамдардың рухани еңбегі мен табиғаттың жасыл шұғыласында адам болмысының поэзиясын көреді, – дейді көрме жетекшісі Лаура Әбілдаева.
Рафаэльдің туындыларында көкшіл түс ерекше орын алады. Ол дәстүрлі түсінік бойынша – Тәңірдің көк аспанмен байланысуы, түркі халықтарының нанымында маңызды және құрметті болып саналады. Сондықтан да көрме «TANIR NURY» деп аталған.
Рафаэль Слекенов Қазақстан Суретшілер одағының мүшесі, Көркемсурет академиясының корреспондент-мүшесі. «Тарлан» сыйлығының иегері. 2000 жылы «Жігер» халықаралық фестивалінің ІІІ орын, 2001 жылы 4-ші Халықаралық «Шабыт» шығармашыл жастар фестивалінің І орын иегері. 2008 жылы Польша Мәдениет министрлігінің шәкіртақысына ие болған. 2010 жылдан бастап Стокгольмдегі «Mirra Art Group» суретшілер халықаралық қауымдастығының мүшесі.