Ташкент, Өзбекстан - Өзбекстан Президенті Шавкат Мирзиёевтің тапсырмасына сәйкес, Қазақстандағы су тасқынынан зардап шеккен халыққа гуманитарлық көмек жөнелтілді, деп хабарлайды Almaty-akshamy.kz сайты uza.uz агенттігіне сілтеме жасап.
Агенттіктің мәліметінше, гуманитарлық жүкті қалыптастыру және оны белгіленген жерге жеткізу ұйымдастыру мәселелері Министрлер Кабинетінің қаулысымен реттелген.
Гуманитарлық көмекті Қазақстан Республикасына Өзбекстан Президентінің кеңесшісі Тұрсынхан Худойбергенов бастаған жұмыс тобы жеткізеді.
15 ірі жүк көлігіне тиелген гуманитарлық көмектің құрамында азық-түлік, әйелдер, балалар және ерлердің сыртқы киімдері, көрпе-төсек, жастық, гигиеналық құралдар, арнайы жабдықталған шатырлар, резеңке қайық жинақтары және басқа да қажетті тауарлар бар.
Бұл шара екі ел арасындағы достық пен ынтымақтастықты нығайтатын маңызды қадам болып табылады.
Естеріңізге сала кетейік, осыған дейін 15 Қытай компаниясы еліміздегі су тасқынынан зардап шеккендерге 300 млн теңге жіберген еді.