Солтүстік Қазақстан облысында телефон алаяқтары екі зейнеткерді ірі көлемдегі қаражатынан айырмақ болған, – деп хабарлайды aqshamnews.kz тілшісі.
Алайда полицейлердің жедел әрекетінің арқасында 6 миллион теңгеге жуық ақша аударылмай, аман қалды,
Алғашқы оқиғада 75 жастағы әйел сауда орталығында банкомат арқылы "Анастасия есімді жиеніне" 1,5 миллион теңге аудармақ болған. Сол сәтте кезекшілікте жүрген полицейлер зейнеткердің алаяқтардың ықпалына түскенін байқап, оны тоқтатқан. Алайда әйел бастапқыда тәртіп сақшыларына сенбей, тіпті полиция бөлімшесіне жеткізілгеннен кейін де алаяқтармен байланысын үзбеген.
СҚО Полиция департаменті киберқылмысқа қарсы іс-қимыл басқармасының аға жедел уәкілі Милена Балацкаяның айтуынша, мұндай тәсіл алаяқтар арасында жиі кездеседі. Олар жәбірленушіні қоршаған ортасынан оқшаулап, өздерін ғана сенімді адам ретінде көрсетуге тырысады.
Көп ұзамай сол банкоматқа тағы бір әйел келіп, 4,5 миллион теңгені басқа есепшотқа аудармақ болған. Бірақ күтпеген жайт оның әрекетін тоқтатты. Телефон арқылы «ұлының» дауысын естіген әйел бірден күмәнданған. Кейін анықталғандай, оның ұлы бірнеше ай бұрын қайтыс болған.
Полиция мұндай алаяқтық схемаларда «қауіпсіз шот», «айна шот» секілді жалған ұғымдар жиі қолданылатынын ескертті. Мамандардың сөзінше, бейтаныс адамдар шұғыл түрде ақшаңызды басқа есепшотқа аударуды талап етсе немесе бұл жайында ешкімге айтпауын сұраса, бұл — алаяқтықтың айқын белгісі.
Тәртіп сақшылары мұндай жағдайда әңгімені бірден тоқтатып, жақындарыңызға не полицияға хабарласуға кеңес береді.