Солтүстік Қазақстан облысындағы ауылдардың біріндегі жеке үйде өрт шықты. Өрт салдарынан ер адам мен кәмелетке толмаған бала қаза тапты, ТЖМ екінші баланы іздеп жатыр, - деп хабарлайды aqshamnews.kz ТЖМ-ге сілтеме жасап.
Қайғылы оқиға 11 қаңтарда кешке М. Жұмабаев атындағы ауданның Майбалық ауылында болды. 101 пультіне хабар түскеннен кейін оқиға орнына өртке қарсы қызмет бөлімшелері жіберілді. Келген кезде үйдің толық отқа оранып, түгелдей құлағаны анықталды.
Үй иесінің айтуынша, ішінде оның жұбайы және кәмелетке толмаған екі бала болған. Өртті сөндіру және үйінділерді аршу барысында құтқарушылар ер адам мен бір баланың мәйітін тапты. Екінші баланы іздеу жұмыстары жалғасып жатыр.
Оқиға орнында департамент басшылығы мен ТЖД психологтары зардап шеккен әйелге көмек көрсетіп жатыр.
Өрт 64 шаршы метр аумақта толық сөндірілді. Өрттің шығу себебі анықталады.
Еске салайық, бұған дейін Талдықорғанда бес қабатты тұрғын үйде ірі өрт шыққан еді. Жетісу облысының ТЖД мәліметінше, өрт сөндірушілер 8 адамды құтқарған, олардың 7-еуі - балалар.