Ақмола облысындағы Сандықтау аудандық соты бұрынғы әйелін ұзақ уақыт бойы аңдып, мазасын алған ер адамға үкім шығарды, – деп хабарлайды aqshamnews.kz тілшісі. Сот оны заңсыз қудалау (сталкинг) бойынша кінәлі деп танып, 100 сағат қоғамдық жұмысқа міндеттеді.
Ақпаратқа сәйкес, ер адам 2025 жылдың маусымынан бері бұрынғы жұбайына маза бермеген: артынан аңдыған, үйі мен жұмысы маңында торуылдаған, қорлайтын хабарламалар жазған, терезеден сығалап қараған.
Өз қауіпсіздігі мен балалардың тыныштығына алаңдаған әйел полицияға арыз жазған. Кейін сталкингке қатысты іс сотқа жеткен.
Сотта айыпталушы кінәсін мойындады. Жәбірленуші тарап хат-хабардың скриншоттарын, аудиожазбаларды және бұған дейін экс-жұбайына қатысты қорғау нұсқамасын бұзғаны үшін шығарылған сот актілерін дәлел ретінде ұсынған.
Іс материалдарын қараған сот ер адамды заңсыз қудалау фактісі бойынша кінәлі деп тауып, 100 сағат қоғамдық жұмыс тағайындаған және 6 айға мінез-құлқына арнайы талаптар қойған. Соған сәйкес оған бұрынғы жұбайын іздеуге, аңдуға, баруға, сөйлесуге, байланыс орнатуға тыйым салынды. Сонымен бірге алкоголь, есірткі және психотроптық заттарды қолданбау міндеті жүктеліп, ай сайын профилактикалық әңгімеге келіп тұру талап етілген.
Еске салайық, бұған дейін ІІМ қазақстандықтарға азаматтардың жеке өмірі мен қауіпсіздігі заңмен қорғалатынын, ал қайта-қайта мазалап, қудалау әрекеттері қылмыс саналатынын ескерткен. Қайталап қоңырау шалу, хабарлама жіберу, әлеуметтік желі арқылы аңду және адамның еркінен тыс қудалау сталкинг ретінде бағаланып, психологиялық әрі қауіпсіздік тұрғысынан зиян келтіретіні айтылған.
ҚР ҚК 115-1-бабына сәйкес, сталкинг үшін 200 АЕК-ке дейін айыппұл, 200 сағатқа дейін қоғамдық жұмыс немесе 50 тәулікке дейін қамау жазасы қарастырылған.