2026 жылғы 16 ақпанда Алматы қаласы Әуезов ауданында «SMART BALA» жобасы аясында «Өнертапқыштыққа алғашқы қадам» атты аудандық конкурс ұйымдастырылып өткізілді, – деп хабарлайды aqshamnews.kz тілшісі.
Аталған шара І.Жансүгіров атындағы №130 гимназия базасында өтті.
Байқаудың негізгі мақсаты – білім алушылардың өнертапқыштық, инновациялық және ғылыми-техникалық шығармашылық қабілеттерін дамыту, оларды жобалық-зерттеушілік қызметке тарту. Байқауға аудан мектептерінің 5–11 сынып оқушылары қатысып, өздерінің тың идеялары мен заманауи жобаларын ұсынды.
Қатысушылар экология және жасыл технологиялар ,тұрмыстық мақсаттағы пайдалы өнертабыстар,әлеуметтік маңызы бар инновациялық жобалар,робототехника және ақпараттық технологиялар бағыттары бойынша бақ сынасты. Оқушылар күнделікті өмірде кездесетін мәселелерді шешуге бағытталған түрлі құрылғылар мен жобаларды ұсынып, шығармашылық ізденістерін көрсетті.
Конкурс екі кезең бойынша өткізілді. Алғашқы кезеңде ұсынылған жобалар сарапталып, үздік жұмыстар іріктелді. Қорытынды кезеңде қатысушылар өз жобаларын қазылар алқасы алдында қорғап, олардың өзектілігі, жаңашылдығы, практикалық маңызы және техникалық орындалу сапасы бағаланды.
Іс-шара барысында білім алушылар тек ғылыми ізденістерін көрсетіп қана қоймай, көпшілік алдында сөйлеу, өз жобасын дәлелдеу, сұрақтарға нақты жауап беру дағдыларын да жетілдірді.
Аудандық деңгейде ұйымдастырылған бұл байқау жас өнертапқыштардың әлеуетін арттырып, мектептер арасындағы шығармашылық ынтымақтастықты нығайтуға ықпал етті. Үздік жобалар марапатталып мадақтамалар берілді.