Сыртқы істер министрлігі Польша аумағында Қазақстан азаматы Екатерина Шилованың қаза тапқанын растады, деп хабарлайды Aqshamnews.kz тілшісі.
Қазақстанның Сыртқы істер министрлігі Польшада Қазақстан азаматы Екатерина Шилованың қаза болғаны туралы ақпаратты ресми түрде растады. Ведомство марқұмның туған-туыстары мен жақындарына көңіл айтты.
Министрлік мәліметінше, Қазақстанның Польшадағы Елшілігі қаза тапқан азаматтың жақындарымен және Польша тарапының құзырлы органдарымен тұрақты байланыста отыр.
«Қазақстан Республикасының Польшадағы Елшілігі қаза тапқан азаматтың жақындарымен, сондай-ақ Польша тарапының құзырлы органдарымен тұрақты байланыста. Елшілік консулдық-құқықтық мәселелер бойынша, соның ішінде марқұмның денесін Отанына жеткізу ісінде қажетті көмек көрсетіп жатыр. Аталған мәселе министрліктің бақылауында», – делінген ведомство хабарламасында.
Еске салайық, бұған дейін Польшада жұмыс істеп жүрген Екатерина Шилованың хабар-ошарсыз кеткені туралы ақпарат тараған еді. Белгілі болғандай, ол 18 ақпанда Варшавадан Астанаға ұшатын ұшаққа билет алған, алайда сол рейске мінбеген.
Сондай-ақ оның соңғы жазбаларының бірінде Астанаға ұшпағанын, Германиядағы құрбысының жұмыс ұсынуына байланысты жоспарын өзгерткенін айтқаны хабарланған.