Шымкентте екі жас жігіт қаладағы смарт-дәретханадан шаш кептіргішті сымымен бірге жұлып алып кеткені туралы ақпарат тарады, деп хабарлайды Aqshamnews.kz тілшісі.
Оқиғаға байланысты жоба координаторлары полицияға арыз түсірген. Құқық қорғау органдарына хабар берілгеннен кейін екі шымкенттік ерікті түрде бөлімшеге келіп, кінәларын мойындаған әрі келтірілген шығынды өтеуге дайын екенін жеткізген.
Жас жігіттердің бірінің сөзінше, ол дәретханада беті-қолын жуып тұрған кезде фенді абайсызда жұлып алған. Оның айтуынша, олар құрылғыны ұрлауды мақсат етпеген, "жөндеп, қайта орнына қоюды ойлаған". Сондай-ақ әкімдік пен жоба үйлестірушілерінен кешірім сұрап, жөндеу шығындарын төлеуге дайын екенін айтты.
Еске салайық, Шымкенттегі смарт-туалеттердің жабдықтары жиі бұзылып, құбырлары бітеліп, интерьеріне зақым келетін жағдайлар тіркеліп тұрады. Мәліметке сәйкес, бір нысанның құны шамамен 50 млн теңге.