Шымкенттегі көпқабатты үйдің бір подъезінде орналасқан үш пәтерден төрт адамның мәйіті табылды, – деп хабарлайды aqshamnews.kz тілшісі.
Алдын ала болжам бойынша, қайғылы жағдай газдан уланумен байланысты болуы мүмкін.
Қайғылы оқиға 3 наурызда күндіз Шымкент қаласының Тұран ауданындағы Студенттік қалашық шағынауданында болған. Алдын ала дерекке сәйкес, бір подъездегі үш пәтерде төрт адам көз жұмған.
Көршілер бірнеше күн бойы газдың өткір иісі сезілгенін айтады. Олардың сөзінше, бір пәтерден 31 жастағы әйел мен 16 жастағы жасөспірім қыздың мәйіті табылған. Екінші қабаттағы тағы бір пәтерден 23 жастағы жігіттің жансыз денесі анықталған. Ал үшінші қабаттағы жалдамалы пәтерде 20 жастағы студент қыздың көз жұмғаны белгілі болды. Пәтер иесінің айтуынша, бойжеткеннің денесі жуынатын бөлмеден табылған.
Подъезд тұрғыны Ислам Файзуллаевтың мәлімдеуінше, алдымен студент қыздың денесі анықталған. Оның айтуынша, пәтер иесі келгенде жуынатын бөлменің есігі іштен құлыптаулы тұрған, есік ашылғаннан кейін бойжеткеннің жуыну кезінде көз жұмғаны белгілі болған. Оқиғадан соң учаскелік полиция шақырылып, тұрғындар сыртқа шығарылған. Кейін құтқарушылар басқа пәтерлердің есіктерін ашып, тағы бірнеше мәйіт тапқан.
Қазір полиция адам өліміне әкеліп соққан қызмет көрсету фактісі бойынша қылмыстық іс қозғады. Газ қызметі әзірге ресми түсініктеме берген жоқ.