Шығыс Қазақстанда кәмелетке толмаған қыз мысықтарды қатырып, кейін оларды бауыздаған. Бұл әрекетті ол әлеуметтік желіде танымал болу үшін жасаған, - деп хабарлайды Аqshamnews.kz тілшісі Устинка LIVE-қа сілтеме жасап.
20 шілдеде болған оқиға жұрттың ашуын туғызды.
Портал мәліметінше, видеоны түсірген қыз небәрі 17 жаста. Ол Риддер тұрғыны болуы мүмкін. Кадрда ол былапыт сөз айтып, күліп, мысықтың ауыр әрі семіз болғанын айтып мәз болады.
"Қазір мынау ериді, сосын бөлшектеп, суретке түсіріп, оны таратамын", – дейді қыз видеода.
Әлеуметтік желі қолданушылары бұл әрекетті қатаң сынап, қызды жауапқа тартуды талап етті.
Шығыс Қазақстан облыстық полиция департаменті бұл жағдайға қатысты пікір білдірді.
"Бұл дерек бойынша 17 жастағы кәмелетке толмаған қыз анықталып, ата-анасымен бірге полицияға жеткізілді. Қазір бұл іс бойынша тексеру жүріп жатыр. Қызға және оның заңды өкілдеріне түсіндірме жұмыстары жүргізіліп, қолданыстағы заңнама талаптары мен жауапкершілік туралы айтылды", – деп хабарлады полиция департаментінің баспасөз қызметі.
Іс материалдары одан әрі қарау және тиісті шаралар қабылдау үшін кәмелетке толмағандардың құқықтарын қорғау жөніндегі комиссияға жіберіледі.
Айта кетейік, полицейлер қызды бір тәулік бойы іздеген. Себебі ол Риддерден басқа қалаға қоныс аударып үлгерген.