Оқиға орнына келген дәрігерлер прокурордың инсультпен ауруханаға түсіп, емделмей шығып кеткенін айтқан.
Тараз қаласы прокуратура бөлімінің аға прокуроры Сергей Налыгачев жергілікті дәмханада шелпекке түйіліп қалып, артынша тұншығып өлген, деп хабарлайды Almaty-akshamy.kz CMN.KZ-ке сілтеме жасап.
Қайғылы оқиға 2024 жылғы 30 маусымда болған. Прокурор қайтыс болған «У Мамеда» дәмханасының әкімшісі оқиғаның егжей-тегжейін айтып берді.
«Налыгачев кафеге досымен бірге келген. Олар тапсырыс берген, даяшы тек шелпек апарып үлгерген. Оның досы тұншығып өлгенін айтты. Ал жедел жәрдем дәрігерлері келгенде ер адамның кім екенін анықтап, бір-екі күн бұрын инсультпен түскенін айтты. Ем алмай, ауруханадан шығып кеткен екен. Досы оған алғашқы көмек көрсете алмаған шығар. Жедел жәрдем 15 минуттан кейін келгенде прокурордың демі үзілген», - деді дәмхана әкімшісі.
Сергей Налыгачев 20 жылдан астам Жамбыл облысының прокуратурасында түрлі лауазымдарда қызмет еткен. Баспасөз қызметінің мәліметінше, ол кәсіби маман ғана емес, мейірімді және жанашыр адам болған.
Жамбыл облысының прокуратурасы марқұмның отбасы мен жақындарына көңіл айтып, моральды және материалды қолдау көрсетуге уәде берді.