Суға жүзуден ұлттық құрама өкілдері Афинада өткен халықаралық турнирде сегіз медаль жеңіп алды. Дүбірлі додаға елімізден барлығы 18 спортшы мен 5 бапкер барды.
Турнирде топ жарғандар 11 шілде-3 тамыз аралығында Сингапурде өтетін су спорты түрлерінен әлем чемпионатына қатысады. Ел құрамасы атынан сынға түскен Әділбек Мусин «Acropolis swim open 2025» халықаралық турнирінде 100 м қашықтықта баттерфляй әдісімен жүзуде алтын медальды жеңіп алса, 50 м қашықтықта осы әдісте жүлделі екінші орынды иеленді.
Сонымен қатар Айбат Мырзамұратов 100 м қашықтықта брасс әдісімен жүзуде екінші, 50 м қашықтықта үшінші орыннан көрініп, ел қоржынына 1 күміс, 1 қола медаль салды.
Айта кетерлігі, Айбат Мырзамұратов халықаралық деңгейдегі спорт шебері нормативін орындап, су спорты түрлерінен әлем чемпионатына қатысу мүмкіндігін жеңіп алды.
Әйелдер арасында 100, 200 м қашықтықта баттер-фляй әдісімен жүзуде Ксения Игнатова топ жарып, ел абыройын асқақтатты.
Әйелдер арасындағы брасс әдісімен жүзуде де отандасымыз Аделаида Пчелинцева 50 м қашықтықта күміс жүлдегер атанды. Сол сияқты баттерфляй әдісімен жүзуде 100 м қашықтықта жерлесіміз Максим Сказобцовтың бағы жанып, қолаға қол жеткізді.
Су спорты түрлерінен ұлттық құрама бапкері Илья Гусаковтың айтуынша, турнир жүзушілердің алдағы байрақты бәсекелерге дайындық деңгейін көрсетіп, олардың бағыт-бағдарын белгіледі. «Спортшылардың жетістіктері аз емес, алайда жоғары деңгейге шығу жолында бізге әлі де көп жұмыс істеу керек. Барлық бапкер мен спортшыға жанкешті еңбегі, командалық рухы, жеңіске деген жігері үшін алғыс білдіремін», деді ол.