Қазақстанның белгілі композиторы, марқұм Арман Дүйсеновтің жары Айсұлу Айданқызы “TalkLike” бағдарламасында сазгердің қазасына қатысты бұрын жария болмаған мәліметтерді айтты, - деп хабарлайды Aqshamnews.kz.
Оның айтуынша, Арман Дүйсенов қайтыс болған жер туралы бұған дейін тараған ақпарат шындыққа сай емес.
"Маған Калелхан Иманмәди хабарласып, “Арманның жағдайы нашар” деді. Ұлымызбен дереу зауытқа жеттік. Жедел жәрдем көлігі сыртта тұр екен. Фельдшерлермен бірге екінші қабатқа көтерілдік, Арманның беті жабулы жатыр. “Не болды?” деп сұрағанымда, “жүрегі тоқтап қалды” деді. Ол ешқандай жертөледе көз жұмған жоқ. Бұл ресми түрде тіркелген", – деді ол.
Айсұлу Айданқызы композитордың соңғы сәті туралы да баяндады.
"Зауыт екі қабатты, ішінде студия жоқ. “Арман бұл жерге неге келген?” деп сұрадым. Олар “Балалармен бірге таң намазына дәрет алған. Балалар сапқа тұрған кезде Арман тұрмай, диванда жатқан. Оятпақ болғанда, тұрмағанын көрдік” деп айтты" - деді сазгердің жары.
Еске сала кетейік, Арман Дүйсенов - қазақ өнерінің дамуына өлшеусіз үлес қосқан, елге сыйлы композитор.