«Самұрық-Қазына» акционерлік қоғамы компаниялар тобы биыл 1,8 трлн теңге таза пайда табуды жоспарлап отыр. Мұны брифинг барысында қордың Экономика және қаржы жөніндегі тең басқарушы директоры Мират Өтепов айтты, деп хабарлайды аlmaty-akshamy.kz.
«Алдын ала бағалау бойынша, «Самұрық-Қазына» АҚ компаниялар тобының 2023 жылғы таза пайдасы 1,8 трлн теңге деңгейінде күтілуде. Мұнай және газ нарықтарында қалыптасқан жағдайды және өндірістік көрсеткіштерді жақсарту бойынша қабылданып жатқан шараларды ескеретін болсақ, бұл жақсы нәтиже саналады», - деді Мират Өтепов.
Спикер түсімге бірнеше фактор теріс әсер еткенін атап өтті. Біріншісі – мұнай бағасының төмендеуі. Қазіргі уақытта 1 баррель мұнайдың бағасы шамамен 80 доллар. Ол былтыр 105 доллар болған еді. Екіншісі – бағаның төмендеуі салдарынан Қазақстаннан экспортталған газ көлемі азайған. Сонымен қатар ел ішінде газға сұраныс артқан.
Биыл «Самұрық-Қазына» АҚ шамамен 658 млрд теңгені мемлекет пайдасына бағыттайды. Яғни, бұл сома дивиденд төлеуге, әлеуметтік жобалар мен қайырымдылыққа жұмсалады. Алдын ала дерекке сай, осы ақшаның 146 млрд теңгесі республикалық бюджетке, 353 млрд-ы әлеуметтік салаға бағытталады. Сондай-ақ активтерді жекешелендіру қорытындысы бойынша мемлекет қазынасына қосымша 92 млрд теңге түседі.