Қазақстанда жол қозғалысына қатысып жүрген қос дөңгелекті көлік құралдарын – электросамокаттар мен велосипедтерді заңнамалық тұрғыда реттеу мәселесі қарастырылып жатыр. Бұл туралы Мәжіліс кулуарында Ішкі істер министрінің орынбасары Санжар Әділет мәлімдеді.
«Қазіргі таңда самокат пен велосипедтерге қатысты арнайы зерттеу жүргізіліп жатыр. Жолда бейберекет жүретін мұндай көлік түрлерін ретке келтіру үшін тиісті ұсыныстар дайындалып, заңнамалық түзетулер енгізілуі мүмкін», – деді вице-министр.
Министрлік өкілінің айтуынша, бұл бастама — қала көшелеріндегі қозғалыс қауіпсіздігін қамтамасыз ету, жаяу жүргіншілер мен жүргізушілер арасында тәртіп орнату мақсатында қолға алынып отыр.
Электросамокаттар мен велосипедтер соңғы жылдары үлкен қалаларда көлік кептелісін айналып өтудің ыңғайлы шешіміне айналды. Алайда олардың көбісі арнайы тіркеусіз, жол ережесіне бағынбай қозғалады. Осыған байланысты мемлекеттік нөмір енгізу — иелерін жауапкершілікке тарту тетігі ретінде қарастырылуда.
Еске салайық, 2023 жылы қабылданған заңға сәйкес, 25 км/сағ жылдамдықтан асатын электросамокаттар мопедке теңестіріліп, оларды тіркеу мен мемлекеттік нөмір тағу тәртібі енгізілген болатын. Жаңа бастама бұл талаптарды барлық қос дөңгелекті құрылғылардың барлығын қамтуы мүмкін.