Үкімет бюджет тапшылығын үш жылда төмендетуге уәде берді. Министрлер кабинеті келесі жылы күшіне енетін Салық кодексіне иек артып отыр. Болжам бойынша жаңа маңызды құжаттың арқасында бюджетке қосымша 3 трлн теңгеден астам қаражат түседі. Парламенттің бірлескен отырысында Олжас Бектенов келген ақшаның барлығы тек дамуға жұмсалады деп отыр.
«Яғни кезекте инфрақұрылымдық нысандарды іске қосу, электр қуаты көздерін, автомобиль және теміржол желісін дамыту, инженерлік желілерді жаңғырту сияқты өте маңызды міндеттерге жолданады. Бұл салалар ұзақ мерзімді, тұрақты экономикалық өсімді қамтамасыз етуге негіз қалайды. Қазір біз келесі 3 жылға арналған республикалық бюджет жобасын дайындап жатырмыз. Өте қызу жұмыс жүріп жатыр. Алдын ала айтатыным, біз 2026 жылы бюджет тапшылығын қазіргі 2,7 пайыздан 2,5 пайызға дейін, 2027 жылы 1,8 пайызға дейін, 2028 жылы 1,4 пайызға дейін төмендетеміз деп жоспарлап жатырмыз», деді Бектенов.