Қазақстанның республикалық маңызы бар автожолдарында өткен жедел-профилактикалық шаралар кезінде жалған, жасырылған, оқылмайтын немесе дұрыс орнатылмаған мемлекеттік нөмірі бар 900-ге жуық көлік анықталды, деп хабарлайды Aqshamnews.kz тілшісі.
Мемлекеттік нөмір – көліктің міндетті сәйкестендіру белгісі. Ол кез келген уақытта анық көрініп, оңай оқылуға тиіс. Жүргізуші нөмірдің таза болуын және дұрыс бекітілуін қадағалауға міндетті. Ал нөмірсіз жүру, нөмірді қолдан жасау немесе өзгерту, сондай-ақ оны оқуға кедергі келтіретін құрылғыларды пайдалану жол ережесі мен заң талаптарын бұзуға жатады.
Шара полиция, көлік прокуратурасы және «ҚазАвтоЖол» ҰК» АҚ филиалдарымен бірлесіп ұйымдастырылған. Мақсат – жол қауіпсіздігін арттырып, құқықбұзушылықтың алдын алу.
2026 жылғы 1 қаңтардан бастап 1 АЕК мөлшері 4 325 теңге. ӘҚБтК-нің 590-бабы бойынша:
-
нөмірі оқылмайтын не дұрыс орнатылмаған жағдайда – 5 АЕК (21 625 тг);
-
нөмірсіз немесе тіркелмеген көлікпен жүру – 10 АЕК (43 250 тг);
-
бір жыл ішінде қайталанса – 20 АЕК (86 500 тг) немесе 1 жылға жүргізуші куәлігінен айыру;
-
қолдан жасалған нөмір орнату – 15 АЕК (64 875 тг);
-
жалған нөмірмен немесе тануға кедергі келтіретін құрылғымен жүру – 5 тәулікке дейін әкімшілік қамау және 1 жылға құқықтан айыру қарастырылған.
Мамандар жүргізушілерге жолға шығар алдында нөмірдің тазалығын тексеріп, берік бекітілгеніне көз жеткізуге кеңес береді.
