Республика күні қарсаңында астаналық жастар «Менің Қазақстаным!» атты акцияны бастады.
Жастар үйлердің балкондарына көк туды іліп қойды. Астана көшелерінде мыңға жуық көк байрақ желбіреп тұр, - деп хабарлайды Aqshamnews.kz.
Елорда әкімдігінің мәліметінше, патриоттық акция жыл сайын өткізіледі. Бұл акция елорда көшелеріндегі жүрген астаналықтар мен қала қонақтарына жүрек тебірентер әсер сыйлады. Астаналықтар акцияға қосылып жатыр.
«Жыл сайын отбасымызбен осы челленджге қатысамыз, балконға ту іліп қоямыз. Бұл қарапайым әрекет, бірақ символдық мәні бар. Қаладағы ілініп тұрған туларды көргенде, елің үшін мақтаныш сезімі кернейді», - деді Сарыарқа ауданының тұрғыны.
Еске сала кетейік, Мемлекеттік рәміздерін орналастыру туралы ережеге сәйкес, азаматтар өз үйлерінің ғимараттары мен балкондарында патриоттық сезімдерді білдіру және Ұлттық жетістіктерді қолдау мақсатында мемлекеттік туды пайдалануға құқылы.
Мемлекеттік рәміздерді пайдаланудың белгіленген стандарттарын сақтау қажет.
