Qarakesek сахналық атымен белгілі рэпер Омар Амантаев сотта есірткіні заңсыз сақтағанын мойындады, – деп хабарлайды aqshamnews.kz тілшісі.
Сот Амантаевты психотроптық заттарды сату мақсатынсыз заңсыз сақтағаны үшін кінәлі деп таныды. Оған 100 сағат қоғамдық жұмыс жазасы тағайындалып, психиатрдың бақылауында мәжбүрлі ем қабылдау міндеттелді. Сондай-ақ ол пробация қызметінің есебіне қойылады. Егер қоғамдық жұмыстардан жалтарса, өтелмеген сағаттар қамауға алмастыруы мүмкін.
Өткен жылдың тамыз айында рэпер есірткілік мас күйінде көлік тізгіндеп жүрген жерінен ұсталған. Тексеру кезінде одан 0,26 грамм мефедрон табылған. Сараптама бұл заттың есірткі екенін растаған.
Сотта Амантаев шамамен бір жылдан бері есірткі қолданатынын және емделуге ниетті екенін айтты.
- Кінәмді толық мойындаймын, айыптаумен келісемін. Синтетикалық затты тауып алдым. Сату ойымда болған жоқ, — деді ол сотта.
Прокурордың «Бұл заттың синтетикалық екенін қалай білдіңіз?» деген сұрағына ол: «Білемін, көргенмін», — деп жауап берген.
Омар Амантаев 31 жаста. Ол Батыс Қазақстан облысының тумасы, үйленген, төрт баланы тәрбиелеп отыр.