Заңдағы жаңа өзгерістерге сәйкес қысым көрсету арқылы некеге мәжбүрлеу үшін 2 жылға дейін, ауыр зардаптар болса, 10 жылға дейін бас бостандығынан айыру жазасы көзделеді, деп хабарлайды aqshamnews.kz
Қылмыстық кодекске некеге тұруға мәжбүрлеу үшін қылмыстық жауаптылық көзделген жаңа 125-1-бабы енгізілді, деп хабарлады бас прокуратура.
Аталған заңға мемлекет басшысы 2025 жылдың 16 шілдесінде қол қойды.
Мәжбүрлеу, әсіресе қысым, қорқыту, психологиялық немесе физикалық зорлық көрсету – бұл адамның негізгі құқықтарын бұзу болып табылады.
Бас прокуратураның хабарлауынша, көптеген елде мұндай әрекет ауыр қылмыс ретінде қарастырылады, себебі мәжбүрлі неке оқшаулау, еркіндікті шектеу, зорлық-зомбылық және кейбір жағдайларда құрбандардың өз-өзіне қол жұмсау әрекеттерімен қатар жүруі мүмкін. Тіпті бірқатар елде мұндай неке адам саудасының бір түрі ретінде танылады.
"Соңғы 5 жылда Қазақстанда осындай 257 қылмыстық іс тіркелді, олардың 95%-ы тоқтатылды. Жаңа заңнамаға сәйкес, қорқыту, бопсалау, күш қолдану немесе басқа да қысым көрсету арқылы некеге мәжбүрлеу үшін 2 жылға дейін, ал егер ауыр зардаптар болса – 10 жылға дейін бас бостандығынан айыру жазасы көзделеді", - деп жазылған хабарламада.
Сондай-ақ Қылмыстық кодекстің 125-бабына өзгерістер енгізіліп, жәбірленушіні ерікті түрде босатса да, істі тоқтатуға жол берілмейді. Енді мәжбүрлі некеге тұру мақсатында әйелді ұрлау Қылмыстық кодекстің 125 және 125-1-баптарының жиынтығы бойынша сараланады.
