Өз болашағын айқындауда халық белсенділігі жоғары, деді брифинг барысында Қырғызстан Орталық сайлау комиссиясының мүшесі Әбдіжапар Бекматов.
«Қазақстан азаматтары мен ел үшін бүгінгі сайлау – өте маңызды оқиға. Сайлау комиссиялары, мемлекеттік органдар референдумға дайындық бойынша, ел халқын ақпараттандыру бойынша үлкен жұмыс атқарды», – деп атап өтті Қырғызстан ОСК мүшесі Әбдіжапар Бекматов.
Оның айтуынша, комиссия қазірдің өзінде Нұр-Сұлтандағы бірнеше учаскеге барып, барлығына дауыс беру үшін қажетті жағдайлар жасалғанына, қатысушылардың белсенділігі жоғары екендігіне көз жеткізді. Халық бүгінгі күннің жауапкершілігін жақсы сезінуде.
Еліміздің Негізгі заңына түзетулер енгізу бойынша референдум өткізу туралы жарлыққа президент Қасым-Жомарт Тоқаев 5 мамырда қол қойды. Қазақстандықтар түзетулерге «қолдап» немесе «қарсы» дауыс беретін болады. Референдумда Қазақстанның 11,7 млн-нан астам азаматы дауыс бере алады.
Қазақстанда дауыс беруге арналған 10 мыңнан астам учаске құрылған. Шетелде дауыс беру учаскелері әлемнің 52 елінде ашық.