Астана қаласында полиция қызметкерлері сауда орталықтарында бірқатар ұрлық жасады деген күдікпен 30 жастағы ер адамды ұстады, - деп хабарлайды Aqshamnews.kz.
Жедел-іздестіру іс-шаралары барысында күдіктінің сауда-ойын-сауық орталықтарының біріндегі дүкенге сатып алушы кейпінде кіріп, парфюмериялық өнімдерді жасырын түрде ұрлағаны анықталды. Еркін қолжетімділікті пайдалана отырып, ол витринадан екі-екіден қымбат әтір құтыларын алып, қалтасына жасырған күйі дүкеннен еш кедергісіз шығып отырған. Келтірілген жалпы материалдық шығын шамамен 300 мың теңгені құрады. Тергеу барысында ұрланған тауарларды күдіктінің кейін сатып жібергені белгілі болды. Жедел уәкілдер ер адамның жеке басын бейнебақылау камераларының жазбалары арқылы анықтап, оны сол аудан аумағында ұстады.
Сонымен қатар, полиция оның қатысы болуы мүмкін тағы үш ұқсас ұрлық дерегін тіркеді. Аталған фактілер бойынша тексеру жүргізілуде. Полиция азаматтар мен сауда нысандарының өкілдеріне қауіпсіздік шараларын сақтаудың маңыздылығын еске салады. Атап айтқанда, келушілердің күмәнді әрекеттеріне назар аудару, тауарлардың сақталуын бақылауды күшейту, сондай-ақ анықталған құқық бұзушылықтар туралы полицияға дер кезінде хабарлау ұсынылады.