Ағымдағы жылдың 4 желтоқсан күні сағат 14.00-де Мемлекеттік қуыршақ театры ересектерге арналған философиялық астары терең, адам жанының құпия әлемін бейнелейтін «Мен кіммін?» спектаклінің премьерасын көрермен назарына ұсынбақ. Қоғамдағы рухани жалғыздық, адамдық келбетті жоғалту, өз-өзімен арпалысу секілді маңызды тақырыптарды қозғайтын спектакль қуыршақ өнерінің мүмкіндіктері арқылы жаңа қырынан ашылады.
Көркемдік шешімі мен идеялық мазмұны терең бұл туынды адамның жан дүниеcіндегі қарама-қайшылықтарды, сенім мен күдік арасындағы күресті, адам табиғатының әлсіздігі мен қуатын символдық бейнелер арқылы жеткізеді. Басты кейіпкердің ішкі жан айқайы, қоғаммен үйлесе алмауы және өзін-өзі тануға ұмтылысы көрерменді терең ойға жетелейді.
Спектакльдің режиссері – әлемдік қуыршақ театры өнерінде өзіндік қолтаңбасы қалыптасқан, Гүржістан елінен арнайы шақыртылған суреткер Николоз Сабашвили.
Театр директоры Алмат Амангелді:
«Мен кіммін?» – қазіргі қоғамдағы өзекті тақырыптарды көтеретін көрермен сұранысына сай спектакль деп ойлаймын. Біз бұл туынды арқылы көрермендерге адамдық болмыстың мәніне қайта қарауға үндейміз. Қуыршақ театры – тек балаларға арналған өнер емес, ол кез келген күрделі идеяны нәзік әрі терең жеткізе алатын сахналық тіл. Премьера көрерменге ерекше әсер, терең ой және рухани толғаныс сыйлайды деп сенеміз», – деп атап өтті.
«Мен кіммін?» – қоғамдағы рухани дағдарыс пен адамдық бет-бейненің жоғалуын көркем түрде жеткізетін ерекше спектакль.
Өтетін орны: Мемлекеттік қуыршақ театры, Пушкин к-сі 63