Қазақ киносының күніне орай елімізде бұрын-соңды болмаған ауқымды жоба – «JARQYRA» республикалық кастингі басталады. Бұл туралы Ұлттық киноны қолдау мемлекеттік орталығының басқарма төрағасы Құрманбек Жұмағали мәлімдеді.
Кастинг 15 қыркүйек күні, сағат 11:00-19:00 аралығында, еліміздің 19 қаласындағы мәдениет ошақтарында бір мезетте өтеді. Кастингке 18 жастан бастап қатысу мүмкіндігі бар. Жоба өңірлік таланттарды анықтауға және олардың отандық киноиндустрияға жол табуына бағытталған.
«Бұл – жай кастинг емес. Бұл – арманға апарар нақты мүмкіндік. Оған бүгінде танымал актерлер дәлел: Гузель Жан – «Игроманка» фильміндегі басты рөлді сомдаған актриса, Самал Еслямова – «Айка» фильмі арқылы Канн фестивалінде жүлде алған актриса, Марат Әбішев – «Адам және алма» фильмінің басты кейіпкері.
Олардың жолы – осындай кастингтерден басталып, үлкен экранға дейін жеткен сәтті үлгі. Алдағы уақытта кастингтен өткен қатысушылар Орталықтың актерлік базасына енгізіліп, болашақта отандық киножобаларға қатысуға мүмкіндік алады», – деді Құрманбек Жұмағали.
Іріктеуден өткен үміткерлердің деректері www.kazakhcinema.kz сайтындағы актерлік онлайн-базаға орналастырылады. Бұл база – кинокомпаниялар мен продюсерлер үшін жаңа есімдерді табуға мүмкіндік беретін ашық әрі қолжетімді алаң болмақ.
Бұған дейін де Ұлттық киноны қолдау мемлекеттік орталығының бастамасымен және қолдауымен отандық кино саласында бірқатар жаңа есімдер танылып, еліміздің мәдени әлеуетін нығайтуға сүбелі үлес қосып келеді. Аталған жұмыстар Мемлекет басшысының мәдени саясатты жаңғырту жөніндегі тапсырмаларын іске асыру аясында, Мәдениет және ақпарат министрі Аида Балаеваның жетекшілігімен жүйелі түрде жалғасып келеді.
«Соңғы жылдары 34 дебюттік фильмге қолдау көрсетіліп, жаңа буын режиссерлер мен актерлердің қалыптасуына нақты жағдай жасалды. Жақында ғана жарыққа шыққан, апат тақырыбын қозғайтын «QAITADAN» дебюттік фильмі 1 апта ішінде 500 миллион теңгеге жуық кассалық табыс жинап, көрерменнің ықыласына бөленді. Сонымен қатар, отандық кинолар халықаралық фестивальдерде де мойындалып, еліміздің мәдени брендіне айналып келеді», – деп атап өтті Құрманбек Жұмағали.