Қол-аяқ үнемі тоңуы бірқатар аурудың белгісі болуы мүмкін. Бұл туралы Life.ru сайтына кардиолог дәрігер, медицина ғылымдарының кандидаты Ирина Поляева айтып берді, - деп хабарлайды aqshamnews.kz тілшісі.
Маманның айтуынша, көбінесе аяқ-қолдың тоңуы қарапайым себептерге байланысты болады: айналадағы ауа температурасының төмендігі немесе аз қозғалу.
Сарапшы бұдан бөлек бірнеше ықтимал себепті атады:
-
Анемия. Гемоглобин деңгейінің төмендеуінен тіндерге жеткілікті оттегі жетпейді, соның салдарынан аяқ-қол тоңады.
-
Қан айналымының бұзылуы. Атеросклероз сияқты ауруларда тамырлар холестерин түйіншектердің салдарынан тарылады, соның нәтижесінде қол мен аяққа қан баяу жетеді.
-
Қалқанша безі қызметінің төмендеуі. Гипотиреоз зат алмасуды баяулатып, жалпы дене температурасын төмендетеді. Көбіне мұндай жағдайда адам тез шаршайды, тері құрғайды және салмақ қосады.
-
Қант диабеті. Диабетпен ауыратындардың аяқ-қолы жүйке жүйесінің зақымдануымен (нейропатия) байланысты тоңады, ол қан айналымының қалыпты реттелуін бұзады.
Егер бұл жиі қайталанса, кардиолог дәрігерге қаралуға кеңес береді. Бұдан басқа, жылы киініп, үйді жылы ұстап және қан айналымын жақсартуға арналған жеңіл жаттығулар жасауға болады.
