Ерекше жандармен жұмыс жасау қажырлы қайрат пен кең жүректілікті талап ететінін жылдан жылға тереңірек ұғынудамын. Қазіргі қоғамда ерекше қажеттіліктері бар балалар мен ересектерді әлеуметтік ортаға бейімдеу – өзекті мәселелердің бірі. Мұндай тұлғалармен жұмыс тек медициналық қолдаумен шектелмей, жүйелі психологиялық сүйемелдеуді де қажет етеді. Парасат әлеуметтік қызмет орталығындағы менің рөлім – олардың эмоционалдық жағдайын тұрақтандыру, ішкі ресурстарын ояту және қоғаммен байланысын нығайту.
Психоневрологиялық ерекшелігі бар адамдар жиі мазасыздық, қорқыныш, оқшаулану, өзіне сенімсіздік сияқты психоэмоционалдық қиындықтарға тап болады. Сондықтан психологиялық жұмыс ең алдымен қауіпсіз орта қалыптастырудан, сенімді қарым-қатынас орнатудан басталуы тиіс. Психологиялық жұмыс барысында адамның өз-өзімен болуына жағдай жасау маңызды. Үнемі түзетуге немесе талап қоюға емес, оның ішкі күйін қабылдауға бағытталған тәсілдер психоэмоционалдық тұрақтылықты қалыптастырады. Тыныштыққа негізделген жеке және топтық психокоррекциялық жұмыстар, арт-терапия, релаксациялық жаттығулар, сергіту сәттері эмоцияларды тану мен басқаруға бағытталған әдістер тұлғаның ішкі тепе-теңдігін қалпына келтіруге әбден көмектеседі.
Сонымен қатар ата-аналармен және жақын туыстарымен жүргізілетін психологиялық жұмыс та маңызды орын алады. Отбасылық қолдау тұлғаның әлеуметтік бейімделуін едәуір жеңілдетіп, өмір сүру сапасын арттырады. Психолог ретінде кәсіби қызметім тек түзету емес, сонымен қатар қабылдау, түсіну және тұлғаны тұлға ретінде мойындауға негізделуі қажет деп есептеймін.
Қорытындылай келе, ерекшелігі бар балалар және ересектермен жүргізілетін психологиялық жұмыс – олардың әлеуетін ашуға, қоғамда толыққанды өмір сүруіне жол ашатын маңызды кәсіби миссия.