Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде ел ішіндегі этникалық әралуандылықты ұлттық байлық ретінде бағалап, бұл ерекшеліктің Қазақстанның тұрақты дамуына ықпал етіп отырғанын баса айтты. Бұл туралы Aqshamnews.kz сайты хабарлайды.
Әралуандылық – бірліктің және күштің бастауы
Мемлекет басшысы әлемнің кейбір елдерінде этникалық әртүрлілік сенімсіздік пен қақтығыс көзі ретінде қабылданатынын айта отырып, Қазақстанда бұл керісінше – қоғамды біріктіретін, болашаққа жетелейтін ұлы күш екенін мәлімдеді.
"Кейбір мемлекеттер үшін этникалық әралуандылық сын-қатердің, сенімсіздік пен төзбеушіліктің белгісі болуы мүмкін. Бірақ бұл біздің жалпыұлттық қазынамыз әрі стратегиялық артықшылығымыз", – деді Тоқаев.
Президент Қазақстан халқының бірлігін нығайтатын басты құндылықтарды да атап өтті. Оларға ынтымақ, диалог, сенім мен құрмет, азаматтық жауапкершілік секілді қағидаттар жатады.
"Осы құндылықтарға арқа сүйей отырып, біз Тәуелсіздіктің зор жетістіктерін сақтап, еселеп, келер ұрпаққа аманаттай аламыз", – деді Мемлекет басшысы.
Президент өз сөзінде Қазақстан халқы Ассамблеясының 30 жылдығы – ел тәуелсіздігі тарихындағы маңызды белес екенін атап өтті. Бұл мерейтой ұлттық келісім мен бірліктің нақты жемісін көрсететін айрықша оқиға болмақ.
"Қазақстан халқы Ассамблеясының 30 жылдығы – егемендік тарихындағы айтулы оқиға. Бұл мерейтой әр азаматтың бақ-берекесін арттыру жолында ұлтымызды ұйыстыратын маңызды белеске айналады деп сенемін", – деді Тоқаев.
Сондай-ақ, Президент елдегі берекелі өмір мен татулықтың қалыптасуына үлес қосқан азаматтардың еңбегін жоғары бағалайтынын жеткізді.
"Біз халқымыздың береке-бірлігін нығайтуға үлес қосқан азаматтарымызға әрдайым құрмет көрсетеміз. Отыз жылда жеткен жетістіктеріміз осындай абзал жандардың еселі еңбегінің жемісі екені сөзсіз", – деп түйіндеді ол.