Астанада әлемнің 30-ға жуық елінен келген 1000-нан астам спортшының басын қосқан «Kazakhstan Open» халықаралық рейтингтік таэквондо турнирі өтті. Жоғары деңгейде ұйымдастырылған жарысқа халықаралық спорт қауымдастығы мен Дүниежүзілік таэквондо федерациясы (World Taekwondo) оң баға берді.
Турнирдің маңызды қорытындыларының бірі – Қазақстанның 2027 жылы WT таэквондо бойынша әлем чемпионатын өткізу құқығына ие болуы. Бұл – отандық спорт үшін де, еліміздің халықаралық беделі үшін де маңызды жетістік.
«Қазақтелеком» АҚ турнирдің бас техникалық серіктесі ретінде жарыс алаңын сенімді әрі жоғары жылдамдықты ІТ-инфрақұрылыммен қамтамасыз етті. Компания ұсынған интернет желісінің арқасында онлайн-трансляциялар, төрешілердің техникалық жабдықтары, баспасөз орталығы және жарыстың барлық техникалық қызметтері үздіксіз жұмыс істеді.
Турнир барысында «Қазақтелеком» АҚ техникалық бөлімшесінің мамандары нысанда тәулік бойы кезекшілік атқарып, байланыс арналарының тұрақты жұмысын қадағалап, жедел техникалық қолдау көрсетті.
Жарыс аяқталғаннан кейін Қазақстан таэквондо федерациясы (WT) «Қазақтелеком» АҚ-ға турнирдің табысты өтуіне көрсеткен қолдауы мен елеулі үлесі үшін ресми алғыс білдірді. Федерация компания ұсынған сапалы ІТ-инфрақұрылым жарыстың жоғары деңгейде өтуіне сеп болғанын атап өтті.
«Осындай ауқымды турнирдің техникалық серіктесі болу – біз үшін үлкен мәртебе. “Kazakhstan Open” – бұл беделді халықаралық жарыс қана емес, сонымен қатар Қазақстанның жоғары технологиялық әлеуетін көрсетуге берілген мүмкіндік. Біз ұсынған инфрақұрылым барлық жүйенің мінсіз жұмыс істеуін қамтамасыз етіп, турнирдің табысты өтуіне ат салысқанымызға қуаныштымыз. Ал жарыс қорытындысы бойынша Қазақстанның 2027 жылғы таэквондодан әлем чемпионатын өткізу құқығына ие болуы – еліміздің әлемдік деңгейдегі ірі жарыстарды қабылдауға толық дайын екенін көрсетеді», – деді «Қазақтелеком» АҚ Корпоративтік бизнес дивизионының техникалық директоры Рүстем Әбеуов.
«Қазақтелеком» АҚ Қазақстанда өтетін ірі халықаралық спорттық іс-шараларды сенімді әрі заманауи телекоммуникациялық инфрақұрылыммен қамтамасыз ете отырып, оларға алдағы уақытта да қолдау көрсете бермек.