Бразилияның Фос-ду-Игуасу қаласында өтіп жатқан бокстан Әлем кубогі кезеңінде Қазақстан құрамасының төрт өкілі алтын медаль үшін жұдырықтасады, деп хабарлайды Aqshamnews.kz тілшісі.
Жартылай финалда Виктория Графеева 60 келіде польшалық Анета Рыгельскаяны 5:0 есебімен жеңді. Аида Әбікеева 65 келіде қарсыласынан 4:1 есебімен басым түсті. Ал 85 келідегі Сұлтанбек Айбарұлы германиялық Валерий Вальтерді 5:0 есебімен ұтты.
80 келіден жоғары салмақта сынға түсетін Валерия Аксенова жеребе бойынша бірден финалға өтті. Бұл салмақта қатысушылар саны екеу ғана.
Ал Алуа Балқыбекова, Жібек Жарасқызы және жарақатына байланысты жекпе-жекке шықпаған Диас Молжігітов жарысты қола медальмен аяқтады.
Финалда Виктория Графеева бразилиялық Ребекка Сантоспен, Аида Әбікеева өзбекстандық Навбахор Хамидовамен, Валерия Аксенова венгриялық Жофия Сирамен, ал Сұлтанбек Айбарұлы бразилиялық Кауе Белинимен кездеседі.