Ақтөбе облысында үш күн ішінде жүзден астам сайғақ қырылып қалған, деп хабарлайды Aqshamnews.kz.
Оқиға Қайрақты өзені маңында болған. Көктемгі көші-қон кезінде шамамен 10 мыңға жуық сайғақ суатқа жақындап, жағасында бір-бірін таптап тастаған. Салдарынан жануарлар қырылуға ұшыраған.
Ақтөбе облыстық орман шаруашылығы және жануарлар дүниесі аумақтық инспекциясының басшысы Әділкерей Әуелбаевтың айтуынша, қазіргі есеп бойынша 108 өлі сайғақ табылған, оның ішінде 65-і аталық, 43-і аналық.
"Алдын ала болжам бойынша, жануарлар өзеннен өту кезінде бірін-бірі таптап кеткен. Қазір оқиға орнында мамандар жұмыс істеп жатыр. Өлекселер мен судан сынамалар алынып жатыр", - деді ол.
Ресми деректерге сүйенсек, Ақтөбе облысында 300 мыңнан астам сайғақ бар. Қырылған жануарлардың өлекселері жиналып, көміліп, оқиға орны дезинфекцияланған.