«Бейбітшілік үшін бірге» ұранымен өткен жаттығуға жүзден астам елдің өкілдері шақырылды
Қазақстан Қорғаныс министрлігінің делегациясы Қарулы Күштердің Әскери-теңіз күштері бас қолбасшысының орынбасары, 1-дәрежелі капитан Данияр Хайрушевтің басшылығымен Пәкістанға барды, деп хабарлайды Almaty-akshamy.kz.
Қазақстандықтар Пәкістан Қарулы Күштері Әскери-теңіз күштерінің бас қолбасшысы, адмирал Мұхаммед Амджад Хан Ниазидің шақыруымен AMAN-2023 көпжақты әскери-теңіз жаттығуына бақылаушылар ретінде қатысуға Қарашиге келді.
«Бейбітшілік үшін бірге» ұранымен өткен жаттығуға жүзден астам елдің өкілдері шақырылды. Аталмыш оқу-жаттығулар елдер арасындағы әскери ынтымақтастықты дамытуға, кемелер қарқынды қатынасатын аудандарда және іздестіру-құтқару операцияларын жүргізу кезінде теңіз қарақшылығынан келетін қауіп-қатерлерін тойтару бойынша әскери теңізшілер арасында тәжірибе алмасуға бағытталған.
Сапар барысында қазақстандықтар әскери-теңіз өнімдерін шығаруға маманданған кәсіпорындардың жаңа технологиялары мен әзірлемелері қойылған I Халықаралық теңіз көрмесіне барды. Кәсіби тәжірибе алмасу тұрғысынан PIMEC-2023 халықаралық конференциясының да пайдасы зор.