Обалы кімге? Киіктің киесі ұрып жүрмесін.
Киік санын реттеуге кіріскен инспекторлардың әрекеті халықтың наразылығын тудырып жатыр. Үкіметтің қаулысымен киіктердің санын реттеуге рұқсат берілді, деп хабарлайды Almaty-akshamy.kz.
Azattyq-ruhy.kz-тің мәліметінше, ақбөкендердің ең көп шоғырланған жері - БҚО аумағы. Елімізде киік саны ресми дерек бойынша 2,6 миллионнан асады. Биыл желтоқсан айына дейін 300 мың киікті аулауға рұқсат берілген.
Бүгінде әлеуметтік желіде "базарда киік еті сатылып жатыр, 1500 теңге/кг" деген хабарламалар тарап кеткен. Журналист Фархат Абиловтың фейсбуктегі жазбасына қарағанда, киіктерді Орал даласынан атып, бір күн салқындатып, базарға алып келеді. Тіпті whats app-тан арнайы топ ашып, адамдар кезекке тұрады. Таласып алып жатқан көрінеді.
Әлеуметтік желі қолданушылары киіктерді осындай жолмен жою ешқандай санитарлық нормаға сай келмейтінін айтуда. Оқырмандар "Бауыздамай атып өлтірген киіктің етін адамдар қалай жейді?", "Бұларға ешкім екпе де салмаған, ертең ауру тарап жүрмесін", "Қызылордада 1450 деген бағамен сатып жатыр, Оралға жақын, Атырауда 1700 теңгеге көтеріп үлгерді" деген сыңайдағы түрлі пікірлер қалдырған.
Тағы бір ақпарат, киіктер Ресейге ауып жатыр деген видеолар тарап жатыр. Осыған байланысты тағы бір пікірді назарларыңызға ұсынамыз:
"Киіктің санын реттеу керек.Бірақ кешенді түрде. Ал ауылшаруашылыққа 12 млрд теңге шығын келді дегені жалған. Бір шаруа қожалық ақбөкеннен келген шығынды нақты айта алмайды. Нақақтан нақақ дала серкесіне жала жапты. Барлық мәселе жерді онды-солды таратып тастауда. Анау табиғат бишараларының баратын жері, басатын тауы, ішетін суы қалмады", - дейді Сәкен Ділдахмет.