Астана халықаралық әуежайында карантинге жатқызылған өнімді әкелу фактісінің жолы кесілді, деп хабарлайды Аqshamnews.kz тілшісі.
Ауыл шаруашылығы министрлігінің ақпаратынша, әуежайдың фитосанитариялық бақылау бекетінде мемлекеттік инспектор карантинге жатқызылған өнімнің ұлттық заңнама талаптарын бұза отырып елге әкелінгенін анықтаған.
"Үндістанда өндірілген, бірақ Корея Республикасынан әкелінген қызанақ тұқымдарынан карантиндік объект — қызанақ жемістерінің қоңыр қатпарлы вирусы (Tomato brown rugose fruit virus) табылды. Бұл вирус ауыл шаруашылығы өндірісіне, әсіресе көкөніс шаруашылығына елеулі зиян келтіруге қабілетті аса қауіпті карантиндік объектілердің қатарына жатады және елдің фитосанитариялық қауіпсіздігіне елеулі қатер төндіреді", - делінген хабарламада.
Карантинге жатқызылған өнімнің иесіне қатысты әкімшілік іс қозғалған. Іс материалдары процессуалдық шешім қабылдау үшін сотқа жолданды.