Олар мұқтаж ата-аналарға балаларын мектепке дайындауға көмектесті.
«Қайырымды істер марафоны» жалпыұлттық жобасы жалғасын тауып, қазақстандық меценаттар мұқтаж ата-аналарға көмектесті, деп хабарлайды Almaty-akshamy.kz.
Меценаттар көп балалы және аз қамтылған отбасы балаларына мектепке керек құрал-жабдық, киім-кешек алып берген. Шараны ұйымдастырушылардың айтуынша, жүзден астам бала шамамен 1 млн теңге сомада атаулы көмек алды.
«Акцияның мақсаты барлық қажетті заттарды – киім-кешекті, рюкзакты, кеңсе тауарларын және басқа қажеттіліктерге белгілі бір соманы жинау және оны жағдайы қиын, тұрмыстық жағдайы төмен отбасында өсіп жатқан балаларға ұсыну болды. Биылғы жылы балаларға арналған жаңа оқу жылы оффлайн режимде өтеді, сондықтан әлеуметтік себептер бойынша балалардың мектепке келмеуінің алдын алу мақсатында біз күзгі жақсылық күнін мерекелеу аясында акцияға бастамашы болдық», - деді Қазақстанның іскер әйелдер қауымдастығының президенті Раушан Сәрсембаева.
«Қайырымды істер марафоны» жалпыұлттық жобасы осы жылдың ақпан айында Мемлекет басшысы Қасым-Жомарт Тоқаевтың бастамасымен Қазақстан Тәуелсіздігінің 30 жылдығын мерекелеу аясында басталған болатын. Жоба ҚР Ақпарат және қоғамдық даму министрлігінің және Азаматтық бастамаларды қолдау орталығының мұрындық болуымен жүзеге асырылуда.
