Өзбекстан астанасы Ташкент қаласында каратэден өтіп жатқан Азия чемпионатында қазақстандық спортшылар топ жарды, деп хабарлайды aqshamnews.kz.
Спортты дамыту дирекциясының баспасөз қызметінің мәлімедеуінше, алдымен Жоламан Биғабыл кумите бағдарламасында 55 келіге дейінгі салмақта финалда жарыс қожайыны Собитхон Қосимовты тізе бүктірді.
Ересектер арасында алғаш рет құрлықтық додаға қатысып жатқан Дайяна Даренская 68 келіге дейінгі салмақта соңғы бәсекеде жапон спортшысы Кама Цубасаны жеңді.
Бұдан кейін татамиге шыққан әлем чемпионатының қола жүлдегері Нұрқанат Әжіқанов (-75 кг) ирандық қарсыласына еш мүмкіндік берген жоқ. Осылайша, Нұрқанат Азия біріншілігінде қатарынан үш рет жеңімпаз атанды. Ал Токио Олимпиадасының қола жүлдегері Софья Берульцева (+68 кг) финалда тағы бір жапон каратэшісі Сумире Сугитаны жеңді.
Енді Қазақстан әйелдер командасы ақтық сында алтын үшін таласады.
Ерлер құрамасы қола жүлде үшін бәсекеде Сауд Арабиясы өкілдерін 3:2 есебімен жеңді. Ел намысын Дидар Әмірәлі, Нұрқанат Әжіқанов, Әбілмансұр Батырғали, Шыңғыс Тайлиев, Никита Тарнакин, Данияр Юлдашев, Ғалым Асылхан және Диас Анарбеков қорғады. Сондай-ақ әлем чемпионы Мөлдір Жаңбырбай тағы бір қола жүлдеге қол жеткізді.