Қытайдың Гуйян қаласында бокстан Әлем кубогының екінші кезеңі басталды. Жарыстың алғашқы күнінде шаршы алаңға көтерілген Қазақстан құрамасының өкілдері сәтті өнер көрсетіп, келесі кезеңге жолдама алды – деп хабарлайды aqshamnews.kz тілшісі Altainews.kz-ке сілтеме жасап.
Алғашқылардың бірі болып 60 келі салмақтағы Серік Теміржанов рингке шықты. Отандасымыз 1/16 финалда Германия боксшысы Денис Брилмен кездесіп, қарсыласынан айқын басым түсіп, төрешілердің бірауыздан қабылдаған шешімімен 5:0 есебімен жеңіске жетті.
Ал 90 келі салмақ дәрежесінде өнер көрсететін Париж Олимпиадасының күміс жүлдегері Нұрбек Оралбай 1/8 финалда Оңтүстік Корея өкілі Гичшае Киммен жұдырықтасты. Қазақстандық боксшы жекпе-жек барысында қарсыласын үш мәрте нокдаунға жіберіп, толық басымдық танытты. Нәтижесінде төреші екінші раундта айқасты мерзімінен бұрын тоқтатып, жеңісті Нұрбек Оралбайға берді.
Осылайша қазақстандық қос боксшы Әлем кубогының келесі кезеңіне сенімді түрде жолдама алып, жүлделі орындар үшін күресін жалғастырады.