Қазақстандық Qazaq Air әуе компаниясы Астана – Екатеринбург бағыты бойынша рейстерін уақытша тоқтатты.
Рейстер 2024 жылдың 28 желтоқсанынан бастап 2025 жылдың 27 қаңтарына дейін орындалмайды. Бұл шешім жолаушылар мен экипаж мүшелерінің қауіпсіздігін қамтамасыз ету мақсатында қабылданған.
Әуе компаниясының ресми мәлімдемесінде рейстердің тоқтатылуы Ресей Федерациясына ұшу қауіптерін бағалау нәтижесімен байланысты екені айтылған. Дегенмен, Омск және Новосібір бағытындағы рейстер жоспар бойынша жалғаса береді, себебі олар белгіленген қауіпсіздік талаптарына толық сәйкес келеді.
Тоқтатылған рейстердің жолаушыларына екі негізгі мүмкіндік ұсынылады:
- Билеттердің толық құнын қайтарып алу.
- Басқа рейстерге тегін қайта брондау.
Qazaq Air компаниясы бұл уақытша қолайсыздықтар үшін жолаушылардан кешірім сұрап, олардың қауіпсіздігі әрдайым басты назарда екенін атап өтті. Әуе компаниясы болашақта рейстердің қайта жандануына қажетті шаралар қабылдайтынын мәлімдеді.