Үкіметте Қазақстанның авиакәсіпорындарын тексеру нәтижелері айтылды, деп хабарлайды aqshamnews.kz.
Премьер-министр Олжас Бектеновтің тапсырмасы бойынша Авиациялық әкімшілік негізгі ірі авиакәсіпорындарды, Астана, Павлодар, Алматы, Ақтау, Шымкент, Өскемен қалаларындағы 6 әуежайды әуеайлақтардың техникалық жай-күйі, ұшуларды авариялық-құтқару және орнитологиялық қамтамасыз ету, алты тұрақты әуе тасымалдаушының 71 азаматтық әуе кемесін перрондық тексеру тұрғысынан тексерді.
Тексеру нәтижесінде 18 бұзушылық жойылды. Сондай-ақ 686 ұшқыштың дайындығы мен ұшу алдындағы бақылауына талдау жүргізілді. Сонымен қатар, Бас көлік прокуратурасымен бірлесіп авиациялық қауіпсіздік мәселелеріне қоса, азаматтық авиацияның негізгі субъектілерін жоспардан тыс тексеру жалғасуда. Бұл деректерді Үкімет отырысында Қазақстанның Авиациялық әкімшілігінің бас директоры Каталин Раду айтты.