Қазақстандағы ақылы автомобиль жолдарынан түскен кіріс мемлекеттік бюджетке шамамен 79 млрд теңге әкелді. Бұл туралы ҚР көлік министрі Нұрлан Сауранбаев үкімет отырысында мәлімдеді, деп хабарлайды Аqshamnews.kz тілшісі.
Министрдің айтуынша, Мемлекет басшысының тапсырмасына сәйкес e-Joldar жүйесі аясында автожолдардың цифрлық паспорттары қалыптастырылып жатыр. Бұл алдағы уақытта пилотсыз көлік жүргізу технологияларын енгізуге мүмкіндік береді.
«Жыл сайын жасанды интеллект технологияларын қолдана отырып, жолдардың диагностикасы жүргізіледі», – деді Сауранбаев.
Сонымен қатар, жол жабынының сақталуын қамтамасыз ету үшін 220 бірлікке дейін автоматтандырылған өлшеу станцияларын орнату жұмысы жалғасып жатыр. Қазіргі уақытта олардың 71-і пайдалануға берілген.
«Бюджетке түсетін салмақты азайту үшін республикалық маңызы бар жолдарда ақылы учаскелер кезең-кезеңімен енгізіліп жатыр. Ақылы жолдардағы KazToll жүйесі арқылы бүгінгі күнге дейін 79 млрд теңге көлемінде қаржы жиналды», – деп атап өтті көлік министрі.