Көктемнің алғашқы күні – 1 наурызда Қазақстанда жыл сайын Алғыс айту күні аталып өтеді. Бұл мереке 2016 жылы ресми түрде бекітіліп, елдегі этностардың қазақ халқына және бір-біріне деген ризашылығын білдіретін күн ретінде орнықты. Мерекелік дата 1995 жылғы 1 наурызда Қазақстан халқы Ассамблеясы құрылған күнмен байланысты.
Бүгінде бұл мереке тек тарихи алғыс айтумен шектелмей, қоғамдағы сыйластық, татулық пен өзара құрметті насихаттайтын күнге айналды. Ал әлем елдерінде ризашылық пен алғыс білдіруге арналған қандай күндер бар?
АҚШ – Thanksgiving
АҚШ-та Алғыс айту күні қарашаның төртінші бейсенбісінде тойланады. Бұл мереке XVII ғасырда ағылшын қоныстанушыларының алғашқы мол өнім алғаннан кейін жасаған шүкіршілік дастарханынан бастау алады. Бүгінде америкалықтар бұл күні отбасы мүшелерімен жиналып, дәстүрлі түрде күркетауық пен асқабақ бәлішін дайындайды. Мереке ұлттық бірлік пен отбасылық құндылықтарды дәріптейді.
Канада – Thanksgiving
Канадада бұл мереке қазанның екінші дүйсенбісінде атап өтіледі. Оның тарихы егін жинау маусымымен байланысты. Канадалықтар табиғаттың берген ырысына, бейбіт өмірге алғыс білдіреді. Дәстүрі АҚШ-тағы мерекеге ұқсас, мұнда да отбасы мүшелері дастарқан басына жиналып, біргемерекелік ас ішеді.
Жапония – Kinrō Kansha no Hi
Жапонияда 23 қарашада Еңбекке алғыс айту күні тойланады. Бұл күннің мәні – еңбек адамдарын құрметтеу және өндіріс пен қоғам дамуына үлес қосқан жандарға ризашылық білдіру. Мектептер мен мекемелерде арнайы іс-шаралар ұйымдастырылып, балалар ата-аналарына және ұстаздарына алғыс білдіреді.
Оңтүстік Корея – Chuseok
Оңтүстік Кореяда қыркүйек–қазан айларында ай күнтізбесі бойынша атап өтілетін Чусок мерекесі бар. Бұл – егінге шүкіршілік ету және ата-баба рухына тағзым жасау күні. Отбасы мүшелері туған жерге жиналып, дәстүрлі тағамдар әзірлейді. Чусок та ризашылық пен отбасы бірлігін білдіретін маңызды мереке.
Германия – Erntedankfest
Германияда қазан айының алғашқы жексенбісінде Егінге алғыс айту мерекесі өткізіледі. Шіркеулерде құлшылық жасалып, ауыл шаруашылығы өнімдерімен безендірілген көрмелер ұйымдастырылады. Бұл күн табиғаттың сыйына және еңбектің нәтижесіне алғыс білдірумен ерекшеленеді.
Қорытынды
Әлем елдерінің тәжірибесіне қарасақ, алғыс айту дәстүрі көбіне егін, еңбек және тарихи оқиғалармен байланысты қалыптасқан. Ал Қазақстандағы Алғыс айту күні – этносаралық татулық пен тарихи тағдыр тоғысының символы. Ортақ құндылық – ризашылық білдіру. Қай елде, қай күні тойланса да, мұндай мерекелер адамдарды мейірімділікке, бірлікке және өзара құрметке үндейді.
