Сенатта есірткі қылмысына қатысты заңға енгізілген түзетулер қабылданды. Жаңа өзгерістер бойынша, «закладчиктерге» жазаны жеңілдету қарастырылса, есірткі өндірушілерге қатысты жаза, керісінше, қатайтылмақ, деп хабарлайды aqshamnews.kz
Ішкі істер министрінің орынбасары Санжар Әділовтің мәлімдеуінше, Қазақстандағы колонияларда шамамен төрт мың адам есірткі қылмысы үшін жазасын өтеп жатыр. Олардың 1220-сы — есірткіні тарату әдісі ретінде «закладка» қолданғандар. Енді осы санаттағы сотталғандарға шартты түрде мерзімінен бұрын босатылу (УДО) құқығы беріледі.
«Бұл қалай жүзеге асады?»
Әділовтің айтуынша, сотталғандар жазасын жеңілдетуді сұрау үшін екі жолды пайдалана алады:
- Құжат тапсыру арқылы жазасын өтеу орнында өтініш беру.
- Адвокаттың көмегімен арнайы өтініш рәсімдеу.
Әр өтініш жеке қаралады.
Сот әр жағдайды жеке қарастырып, заңның талаптарына сәйкес шешім шығарады. Осылайша, сотталғандар мерзімінен бұрын босатылу мүмкіндігіне ие болады.
Есірткі қылмысымен күресте бұл қадам заңды ізгілендіру әрекеті ретінде қарастырылып отыр. Алайда, есірткі өндірушілерге қатысты жаза әлдеқайда қатаң болатынын ескерген жөн.