Қазақстанда қызылшаға қарсы қабылданған шұғыл шаралар өз нәтижесін бере бастады, деп хабарлайды Aqshamnews.kz тілшісі. Бұл туралы Қазақстан Республикасы Денсаулық сақтау министрлігі мәлімдеді.
Министрлік дерегінше, кейінгі бір аптада сырқаттанушылар саны 25,4%-ға азайған. Егер алдыңғы аптада 417 жағдай тіркелсе, кейінгі жеті күнде бұл көрсеткіш 311-ге дейін төмендеген.
Соған қарамастан, эпидемиологиялық ахуал толық тұрақталды деуге ерте. Қызылша жұқтыру деректері әлі де тіркелуде. Ең көп жағдай Астана қаласында – 81, Алматы және Атырау облыстарында – 57-ден, Қостанай облысында – 57, ал Алматы қаласында 48 жағдай анықталған.
Аурудың алдын алу мақсатында қосымша иммундау жұмыстары күшейтілді. 2026 жылдың басынан бері 6–11 айлық 36,7 мың сәбиге екпе салынған. Сонымен қатар жоспарлы вакцинация аясында 1 жастағы 21,4 мың (6,7%) және 6 жастағы 17 мың (4,7%) бала қамтылды. Бұрын екпе алмаған 18 жасқа дейінгі 8,1 мың жасөспірімге де вакцина егілген.
Эпидемиологиялық жағдай тұрақталғанша бірқатар шектеу шаралары енгізілді. Ұйымдасқан ұжымдар мен әскери бөлімдерде екпе алмаған азаматтар уақытша жұмыстан шеттетіледі. Сондай-ақ ауруханаларға жоспарлы түрде жатқызу кезінде бақылау күшейтілген.
Дәрігерлердің айтуынша, науқастардың басым бөлігі – 14 жасқа дейінгі екпе алмаған балалар. Осыған байланысты ата-аналар вакцинация мәселесіне жауапкершілікпен қарауға шақырылды.